Шахмат ден танасымаш
Тунемше-влак коклаште районышто ончыл вер верч 46 йоча учашен. Рвезе-влак коклаште умашсе чемпион П. Ростунов эн тале лийын (3 МСШ). Тудо кудыт гыч 5,5 очкым поген. Тудын деч пел очкылан кум шахматист кодын. Но ешартыш показательлан кора Д. Криваксин кокымшо верыш лектын (Руэм лицей), кумышыш – М. Криворотов (гимназия).
Удыр-влак коклаште М. Кузьмина (лицей) икымше верым сене налын. Тудын деч пел очкылан кок шахматист кодын. Но коэфициентым шотлымек, кокымшо верыш В. Никитина лектын (лицей), кумышыш – Д. Корюкина (2 МСШ).
Кок арня гыч 37 первоклассник да йоча садыш коштшо-влак «Шыжымсе каникул» турнирыште учашеныт. Мемнан деке Казань да Йошкар-Ола гыч шахматист-влак толыныт. Садлан икымше вер верч учашымаш пытартыш тур марте каен. Мемнан рвезе-влак кокла гыч кокымшо верым Д. Новоселов гына налын (гимназия).
Мемнан удыр-влак гын кум призовой верым сенен налыныт. Ныл очко ден Е. Насырова икымше верыш лектын (3 МСШ), кокымшыш – А. Скобелева (2 МСШ). Кок удырынат показательышт икгай лийын, нунылан кумышо верым пуымо. Тиде Я. Голосова да Н. Гольцварт (гимназий).
К Житниковынат (гимназий) сайын модмыжым палемдаш кулеш. Йошкар-Оласе первенствыште полуфиналыште тудо нылымше верыш лектын, тыге Йошкар-Оласе финалыш да поръен-влак коклаште республикын финалышкыже путевкым сенен налын.
Снимкыште: «Шыже каникул» турнирын призержо-влак.